ಉಡುಗೊರೆ
ಕಿತ್ತು ತಿನ್ನುವ ಬಡತನದಲ್ಲೂ ಪ್ರೀತಿಯ ಶಿಖರದಲ್ಲಿದ್ದರವರು.
ನೀರೆರೆದುಕೊಂಡ ಅವಳು ತಲೆತುಂಬ ಮಲ್ಲಿಗೆ ಮುಡಿದು ಆತನ ಬರುವಿಕೆಯನ್ನೇ ಕಾಯುತ್ತಿದ್ದಳು.
ಆತ ಸೋತು ಬಂದಿದ್ದ ; ಅಂದಿನ ಕೂಲಿ ಸಿಗದೆ.
ದಿನದ ಅದೇ ನೈದಿಲೆಯ ನಗೆಯೊಂದಿಗೆ ಆತನನ್ನು ಸ್ವಾಗಸಿದಳು. ಪ್ರೀತಿಯ ಅಪ್ಪುಗೆ ನೀಡಿದಳು. "ಜನ್ಮದಿನದ ಶುಭಾಶಯಗಳು "ಆತ ಕಿವಿಯಲ್ಲಿ ಉಸುರಿದ. ಆತನ ತುಟಿಗೆ ಹೂಮುತ್ತೊಂದನ್ನೊತ್ತಿ ಹುಟ್ಟು ಹಬ್ಬದ ಸಿಹಿಯಾಗಿ-ಕೇಳಿದಳು.
"ಉಡುಗೊರೆ ಏನೂ ಇಲ್ವಾ? "
'ಯಾಕಿಲ್ಲ ? ಎನ್ನುವಂತೆ ಆತ ಕೈಲಿದ್ದ ಕಾಗದವನ್ನು ಅವಳ ಕೈಲಿತ್ತ.
ಬಿಡಿಸಿ ನೋಡಿದಳು. ಅದರಲ್ಲಿ,
"ನಿನ್ನಿಸ್ಟದ ಆಕಾಶ ಬಣ್ಣದ ಸೀರೆ " ಎಂದು ಬರೆದಿತ್ತು!
"ಥಾಂಕ್ಯೂ" ಎನ್ನುತ್ತಾ ಒಳ ನಡೆದ ಆಕೆ ಸ್ವಲ್ಪ ಸಮಯದ ನಂತರ ಮರಳಿ ಬಂದು, ಆತನ ಕೈಗೂ ಒಂದು ಕಾಗದ ಕೊಟ್ಟಳು. ಅದರಲ್ಲಿ ಹೀಗೆ ಬರೆದಿತ್ತು....
"ಹ್ಯಾಗೆ ಕಾಣಿಸ್ತಾ ಇದ್ದೀನಿ ?"
#ಎಮ್. ಎಸ್. ಶಿವಸಿಂಪಿ.
No comments:
Post a Comment